terror, assault, anthrax

I fiacht mi
fua dem wos ís.  

Scho’ in da Frua,
stön si ma d’Hoa auf,
auf’d Nocht schau-I Zeid-im-Büd.
Mei Nochba is a Gfrast. 
I trau nua mein Hund,
dem Vladimir.
Ea hot so a schens Fœ,
schwoaz-weiß, bœt net,
red’t ma ned zruck.  

Ea hoid ma d’Zeidung vo-da-Dia.
I dung ma d’Semme in Kaffä,
I lés.
Da Vladi liggt ma bei d’Fiass,
schaud mi treiheazig au.
Da Islam is ma wuascht:
Kumman ä nua Katoliggn vo-duat, 
Kinda und Mentscha:
Des gäd.  

Mei Haus is gross gnua und recht sché.
De Tujen san supa gebflegt.
Da Dragan schneidts-ma im Heabst.
I bin gean allani mid mia.
Do kau-i duan, wos I wü.
Wauns pumpat gä i net aun di Dia.
De Schríd gengan oiweu glei fuat.  

Owa vuriche Wochn, do° ned.
Do hods klopft.
I hob mi net griad, hoidt Luft au:
És Pumpan head auf,
owa kana gäd fuat.
Da Vladi hot knuad, wia-r-a Ansa.
Mei Woschmaschin
ís a Dreg dageng.
I gä zum Guggal, ria mi ned:
I hob an neichn Spion,
Alibaba song’s, mit Kamara.  

Aufm Bü°l woa owa nua I, 
und’s Heaz hot ma pumpat, fia Zwá.